Cetia lucu

Tanta Ola deng pelayan

Tanta Ola so rasa stress, lantaran, dia kalu lia orang so sadiki babayang.
Lantaran dia pikir depe mata so rusak, dia pigi di toko kaca mata.
Pelayan : "Siang tante, ada yang boleh kita bantu?"
Tanta Ola : "Kita pe mata so rusak ini noh...cari akang kacamata yang pas dang?"
Pelayan : "Tante so pernah pake kacamata?"
Tanta Ola : "Ohh..blum...."
Pelayan : "Kalu bagitu torang priksa dulu tante pe mata. Mari tante, torang ke tampa priksa."
Pelayan : "Tante, ini huruf apa ?" (sambil tunjung tu huruf yang sadiki basar )
Tanta Ola : "Nyanda jelas noh..."
Pelayan : "Kalu huruf ini dang?" (Sambil tunjung tu huruf yang lebeh basar)
Tanta Ola : "Masih nyanda jelas noh..."
Pelayan : "Ini komaling tanta huruf yang paling besar yang ada disini. Sekarang tanta bilang, ini huruf apa?" (sambil tunjung huruf yang depe basar
rupa piring )
Tanta Ola : "Sama noh...masih nyanda jelas"
Pelayan : (sambil garo-garo kapala lantaran bingo) "Kiapa dari tadi nyanda jelas dang tanta?"
Tanta Ola : "Kita kwa nintau babaca, ngana kase tunjung huruf. Mana kita mo tau?"


Kirim Surat Nyanda Pernah Balas

Ibu Guru : " Utu, kiapa kalamarin ngana nyanda maso skolah ?"
Utu : " Sakit, Nci !"
Ibu Guru : " Kiapa nyanda kirim surat ?"
Utu : " Percuma ! Nci kwa nyanda pernah balas...?????"


Baku Piara

KEKE : "Utu tempo apa dang ngana mo kaweng pa kita, so malo kita orang lia lia so ba tinggal deng ngana? Bulan Oktober jo neh !"
UTU : "Oh ... nemboleh no! soalnya kita ada banya urusan dikantor bulan Oktober"
KEKE : "Kalo bagitu November jo dang."
UTU : "Adoh... kasiang jo pa ngana..... November kita mo ada pelantikan kenaikan pangkat"
KEKE : "Oh kalo bagitu Desember jo neh... biar rame"
UTU : "December kua talalo rame karna hari Natal, sabar jo... nanti January taong datang"
KEKE : "Oh... jangan January bahaya... ngana mo geger otak..."
UTU : "Dari mana ngana tahu... tukang ramal so ngana?"
KEKE : "Kita bukan tukang ramal... maar kalo so' bulan January kita mo beking picah deng botol ngana pe kapala..."


Tong Tiga Naik Becak

Ada tiga nona nona dari Manado mo nae tu becak, kong bilang bagini 'pa itu tukang becak.
"Bang ! 'Tong tiga boleh...?"
Kong 'tu abang manyao bagini : "Hah...?! Tong satu aja berat banget apalagi tiga, Neng !!!"


Kase Maso Ulang

Pulang dari greja, om Utu pe dua mata bangka deng' biru merah, sampe de pe istri kage skali...
Tanta Mintje "Utu, kiapa sampe bagitu tu' mata ?"
Om Utu : "Tadi kwa di greja samantara manyanyi, tiba tiba ada cewek fasung maso deng rok pendek skali, maar de pe rok dang', ada tamaso kadalang pa de pe panta, karna dia badiri pas pa kita pe muka, jadi kita hela akang de pe rok supaya rapi dang..., maar tu' cewek malah 'da tinju kamari 'tu mata sablah kiri..."
Tanta Mintje : "Maar, kiapa 'tu mata kanan bangka dang...?"
Om Utu : "Karna kita kira dia nyanda' suka 'da hela de pe rok, kong terpaksa kita kase maso ulang tu rok kadalang..., kong dia tinju tu le kita pe mata sablah..."